Friday, July 17, 2009

சோதிடந்தனை இகழ் !

அறிவியல் மனப்பான்மையை மக்களிடம் வளர்க்க வேண்டும் என்பது இந்திய அரசியல் சாசனத்தின் பார்வை. அனைத்து அறிவியலாளர்களும் ஜோதிடத்தின் விஞ்ஞானப் பூர்வ நம்பகத் தன்மை குறித்து எம்மிடம் கேட்டால் அதைக் கண்டிப்பாக மறுப்போம் என்கின்றனர்.

உலகப் புகழ் பெற்ற இந்திய அறிவியலாளர்கள் பலரும், அறிவியல் இயக்கங்களும், சமூக விழிப்புணர்வுக் குழுமங்களும், பகுத்தறிவு இயக்கமும், வானவியல் ஆய்வாளர்களும், சிந்தனையாளர்களும், தத்துவ ஆசிரியர்கள் படைப்பாளிகள் சோதிடம் குறித்த கடுமையான ஆராய்ச்சி செய்தவர்கள் ஆகிய யாவரும் எதிர்ப்பு தெரிவித்த பின்பும் சோதிடப் பாடம் பட்டப்படிப்பு, பட்டயப் படிப்புக்கு ஒரு பாடமாக வைக்கப்பட்டுள்ளது.

உலக நாடுகளின் கல்வி நிறுவனங்கள் யாவும் அண்டத்தை அளக்குமளவிலான முற்போக்குப் பயணம் மேற்கொள்கிற இக்காலத்தில் நம் நாட்டில் மருத்துவம், குடிநீர், அடிப்படைக் கல்விக்கான அடைவுகள் நோக்கிய பயணம் வேகமாக்கப்பட வேண்டிய நிலையில் இருக்க, வேலையின்மை, திறனுக்கு மதிப்பின்மை ஆகிய விரக்திகளால் தன்னம்பிக்கை குறைந்து தற்கொலைச் சிந்தனையின் சின்னங்களாக உலவுகிற இன்றைய, பெரும்பாலான இளைஞர்களுக்கு தன் முயற்சி கூடும் தொழில் முனைவோர், தொழில் வளர்ச்சிகள் நலிந்து கொண்டிருக்க படித்தவர்கள் நிலையிதுவெனில் தன்உழைப்பு முழுவதையும் தன் பாமரத்தன்மையால், மூட நம்பிக்கைகளால் பழமை வாதங்களால் சூடமாய் சாம்பிராணியாய் பலர் எதிர்த்துக் கொண்டிருக்க இதற்கு மாற்றான அறிவியல் உணர்வு வளர்க்கப்பட வேண்டிய காலம் இது.

தன்னம்பிக்கை, சுயமுன்னேற்றத்திற்கான, நேர நிர்வாகம் தொடர்பான பயிற்சிகள் கால, தேச, பிரபஞ்ச வர்த்தமானங்கள் குறித்த நமது மரபு வழியிலான வானவியல் அறிவு, சுய சிந்தனையின் வழி தன்னை தன் ஆன்மச் சூழலை உணரவைக்கிற உளவியல் மெய்ப்பிப்புகள் நிறைந்த பாடல்கள் வரவேற்கத்தக்கது.

தந்தை பெரியார் நூற்றாண்டு கடந்த இச் சூழலில் இப்பகுத்தறிவு யுகத்தில், பிழைப்பு வாதத்திற்காக கணிப்பொறிகளும் ஜாதகம் பார்க்கத் தொடங்கி விட்டன. மக்களது சுய சிந்தனையை, திட்டமிடலை மழுங்க வைக்க காலையிலிருந்தே தொலைக்காட்சிகள் அவையவை ஆளுக்கொரு திசையையும் வாய்க்கு வந்த திசையையும் வாய்க்கு எந்த எண்களையும் ராசியோடு வாரி வழங்குகின்றன.

ஜோசியம் கணிக்கிற நபர் ஒருவர் நாளேடொன்றிற்கு ஒரு வாரம் ராசிபலன் எழுதி அனுப்ப மறந்தால் அந்த ஏட்டின் ஆசிரியர் பழைய வாரப் பத்திரிகைகளை எடுத்து அவசரத்திற்கு வெளியிட அதற்கும் பல வாழ்த்து மடல்கள் வந்ததாகச் சொன்ன வரலாறுகள் நாம் அறிந்ததே.

இப்படியாக சோதிடம் என்பதே, கற்பனை, பொய் என்பதற்கான அறிவியல் வழியிலான சான்றுகளைச் சோதிடர்களின் கூற்றுகளை நடை முறைகளைக் கொண்டே நிறுவ முடியும்.

(எ.கா.) சோதிட முறைப்படி கோள்கள் பன்னிரண்டு. ஆனால் உண்மையில் கோள்கள் ஒன்பது. பிறந்த நேரம் கோள்களின் அமைப்பு இவை யாவும் ஒவ்வொரு தனி மனிதனுக்கும் வாழ்க்கை மாறுபாடுகளை ஏற்படுத்தும் எனச் சொல்லி அப்பட்டமாக ஏமாற்றுவது ஊழ்க்கோட்பாடு (விதி) என்பதான பெயரில் சிந்திக்க மறுக்கிற சமூகத்தை உருவாக்கி விடும். அவலத்திற்குரிய செய்தி யாதெனில் குழந்தை பிறப்பு கூட தற்போது நல்லநேரம், காலம் என்பதாகக் கூறி இயல்பாகப் பிறக்கும் நிலையிலும் கூறி இயல்பாகப் பிறக்கும் நிலையிலும் கூட அறுவை சிகிச்சைக்கு உட்படுத்தப்பட்டு குறிப்பிட்ட நாள், குறிப்பிட்ட நேரத்தில் குழந்தை பிறக்கச் செய்வதை உலகம் காண்கிறது. இப்பேரண்டத்தின் இயக்கம், கோள் நிலை மாறுபாடுகள் இவற்றால் புவியல் உள்ள ஒட்டு மொத்த உயிரினங்களுக்கும் ஏதேனும் விளைவுகள் ஏற்படுமே தவிர (சான்று: காஸ்மிக் கதிர்கள்) ஒவ்வொரு தனி மனிதனுக்கும் இன்னின்ன விளைவுகள் ஏற்படும் என்பது உண்மையல்ல என உருசிய நாட்டு அறிவியலாளர்கள் கூறுகின்றனர்.

உலகத்தை உள்ளங்கையில் அடக்குகிற தகவல் தொழில் நுட்ப ஊழிக்காலத்தில் உன் உள்ளங்கை ரேகையில்தான் வாழ்க்கையே இருக்கிறது என்று சொல்லுகிற சோதிடத்தை அண்மையில் நேபாள மன்னர் குடும்பக் கொலைகள் பொய்யென்று காட்டின.

முன்பு கிருஷ்ணதேவராயரின் வாழ்நாள் இவ்வளவு என்று (சோதிடம்) கூறிய ஆருடனுக்கு நிலமும் பொன்னும் கொடுக்க, சொன்னவனை அழைத்து, உன் ஆயுள் காலம் எவ்வளவு? எனக் கேட்டு அவனை அக்கணமே வெட்டிச் சாய்த்து அச்சோதிடம் பொய்யென உணர்த்திய தெனாலிராமன் கதை நிலவிய சமூகம் இது.

அண்ணனுக்கு அரசு தந்து, அன்றே துறவறம் பூண்டு சோதிடத்தைப் பொய்ப்பித்த ஊழ்வினை உறுத்து வந்தூட்டும் என்று சொல்லி ஊழுக்குப் புது விளக்கம் தந்த சிலம்பாசான் இளங்கோவடிகள்.

இப்படியான வரலாறு படித்த இளைஞர்களை எதிர் காலச் சோதிடர்களே வாருங்கள்! என கல்வி நிறுவனங்கள் அழைக்கத் தொடங்கியிருப்பது கவலைக்குரியது. ஆன்மீக ரீதியாகப் பார்ப்பினும் சிறுதெய்வ வழிபாடாயினும் பெருந்தெய்வ வழிபாடாயினும் இறையுணர்வொன்றே தன்னம்பிக்கைக்கு ஊன்று கோலாகவும் உளவியல் ரீதியான பாதுகாப்பு உணர்வையும் நல்குமென்பதை, ஞாயிறு திங்கள் செவ்வாய் . சனி பாம்பிரண்டுடனே... ஆசறு நல்ல நல்ல அவை நல்ல அடியாரவர்க்கு மிகவே என்று திருமுறை சுட்டுமாப்போல அவரவர் இறை என்ற உயர் சக்தியோடு, சக்தியை நினைந்து இயங்கும்போது இடையில், அண்மைக் காலத்தில் மிகவும் அச்சமூட்டு வதாகவும், வணிகம் போலவும் பெருகிவிட்ட இந்த நவகிரக வழிபாடு அது குறித்த பரிகாரங்கள் என்பவை யாருடைய நலனுக்கானவை என்பது சிந்திக்கத் தக்கதாகின்றது.

இயல்பான அறிவுடைய ஒரு மனிதராய் அறிவியலாளியாய் மதுரை காமராசர் பல்கலைக்கழகப் பேராசிரியர் கே. ராஜு அவர்கள், ஒரு விஞ்ஞான ஆசிரியர் என்ற முறையில் எனது கவலை இதுதான். ஹைட்ரஜனும் ஆக்ஸிஜனும் ஒரு குறிப்பிட்ட முறையில் சேர்ந்தால்தான் தண்ணீர் ஆகும் என்றால் அதைச் சோதித்துப் பார்க்கிற யாருக்கும் ஒரே மாதிரியான விடை கிடைக்கும். ஆனால் நூறு சோதிடர்கள் ஒரே ஜாதகத்தை ஒவ்வொருவரும் ஒவ்வொரு விதமாகக் கணிக்கிற கூத்துதான் நடக்கிறது. இதில் யாருடைய கணிப்பைக் கொண்டு போய் பல்கலைக்கழகத்தில் மாணவர்களுக்கு போதிக்கும்? நூறு கோடி மக்களுக்கும் பல்வேறு நம்பிக்கைகள் உண்டு. இவையெல்லாம் பாடமாக வைப்பது அவசியம்தானா? என்று வினா எழுப்புகிறார்.

தங்களிடம் வருபவர்களின் மனநிலையறிந்து அதற்கேற்ப ஆறுதலும், அவர்களுக்கு தற்காலிக மகிழ்ச்சியையும் மன நிறைவையும் சொல் ஜாலத்தால் ஏற்படுத்தி அவர்களது இயலாமையை முதலாக்கி பரிகாரம் ஏதாவது சொல்லி இயன்றவரை பணம் பறிப்பது எமது தொழில் ரகசியம் என்பது சோதிடர்களே ஒத்துக் கொள்கிற ஒன்று. ஒன்றுமற்ற இதனை பாடமாக்க, அதை மாணவர்கள் படிக்க, நாளைக்கு அவர்களும் கட்டாயம் அங்கீகாரம் பெற்ற நவீனப் புரோகிதர்களாகத் தான் அலையவேண்டி வரும். இசுலாமிய, கிறித்துவ இதர சமயத்தார் பெற்றிருக்காத ஜாதகம், ராசி, நட்சத்திரம் இவை பற்றிய இப்படிப்பினை எவ்வளவோ அடிப்படை அறிவியல் துறைகள் விரிவுபடுத்த வேண்டிய சூழலில் கொணர்வது தொழில் நுட்ப யுகத்திற்கான அடையாளமா? என அய்யுறவேண்டி இருக்கிறது. இதைப் படித்துவிட்டு நாளைக்கு ஓர் ஆசிரியராக வரக்கூடியவர், தன் மாணவனின் ஜாதகம் பார்த்து நீ தேருவாய், நீ தேரமாட்டாய் என்று கைராசி பார்க்கக் கூடும்.

மாவட்ட ஆட்சியாளராய் வரக்கூடியவர் இங்கே இருக்கும் குடிநீர்ப் பிரச்சினைக்கு வாஸ்து சாஸ்திரமே காரணம். எனவே யாகம் வளருங்கள் என்று சொல்லக் கூடும். மேலும் இது இன்று வளர்ந்து வரும் பெண்ணியத்திற்கு முரணானது. ஏற்கெனவே தோஷம், ஜாதகப் பொருத்தம் இப்படியானவற்றால் முதிர் கன்னிகள் பெருக, இதன் மூலம் மீண்டும் பெண்ணடிமைத்தனத்திற்கே இந்த ஆணாதிக்க சமூகம் வழிகோலும். அன்றே தன்னோர் செய்யும் புரோகிதம் என் தொழிலல்ல எமக்குத் தொழில் கவிதை என்று சொன்ன நம் தோழன் பாரதியின் அக்கினிக் குஞ்சுகளாய் அறிவுத் திறன் கொண்டு மடமையைக் கொளுத்துவோம்.

--------------------நன்றி: தவத்திரு குன்றக்குடி அடிகளார் அவர்களை ஆசிரியராகக் கொண்ட "அறிக அறிவியல்", ஜூலை 2009 இதழிலிருந்து...

Tuesday, April 21, 2009

கிரகங்களின் சக்திதான் மனித வாழ்வை நிர்ணயிக்கிறதா?

கிரகங்களின் சக்திதான் மனித வாழ்வை நிர்ணயிக்கின்றன என்கிறது சோதிடம்! அதை மறுக்கிறார்கள் கீழ்க்கண்ட விஞ்ஞானிகள்:

1. தில்லி பல்கலைக்கழக விஞ்ஞானி

2. தமிழ்நாடு வானவியல் விஞ்ஞானி தேவதாஸ்

3. சன்தொலைக்காட்சியில் உரையாடிய விஞ்ஞானி

பூமி தன்னைத்தானே 18.5 கி.மீ வேகத்தில் மேற்கிலிருந்து கிழக்காகச் சுற்றுகிறது.

சூரியனிலிருந்து பூமி 15 கோடி கி.மீ தூரத்தில் உள்ளது. பூமி வினாடிக்கு 29 கி.மீ வேகத்தில் சூரியனைச் சுற்றி வருகிறது. சூரிய ஒளி பூமிக்கு வந்து சேர 7ஙூ நிமிடம் ஆகிறது. பூமி ஒரு உயிர்க்கிரகம்! இங்கு தான் உயிரினங்களும் தாவரங்களும், மனிதன் உயிர் வாழ்வதற்குத் தேவையான உயிர்க் காற்று (பிராண வாயு), நீர், மிதமான வெப்பம் இருக்கின்றன.

கடுங்குளிராலும், அதிக வெப்பத்தாலும் மற்ற கிரகங்கள் வறண்டு கிடக்கின்றன. இந்த வறண்டு போன கிரகங்கள் ஒவ்வொன்றுக்கும் ஒரு சக்தி உண்டு என்றும் அந்த சக்திதான் பூமியிலுள்ள மனிதர்களின் வாழ்வை நிர்ணயிக்கிறதென்றும் கூறும் சோதிடர்கள்,உயிர்த்துடிப்பான பூமி கிரகத்திற்கு என்ன சக்தி உள்ளது என்று சொன்னதுண்டா?

வியாழன், சனி இரண்டு கிரகங்களும் பூமியை விடப் பெரிய கிரங்கள்! மற்ற புதன், வெள்ளி, செவ்வாய்க் கிரகங்கள் பூமியை விடச் சிறிய கிரகங்களே! பூமிக்குப் பக்கத் திலே 4 கோடி கி.மீ. தூரத்திலுள்ள சிறிய கிரகம் வெள்ளிக்கிரகத்திற்கோ 9 கோடி கி.மீ. தூரத்திலேயுள்ள செவ்வாய்க் கிரகத்திற்கோ பூமியால் எந்தக் காலத்திலாவது பாதிப்பு ஏற்பட்டதென்று கூற முடியுமா?

பூமியால், பக்கத்திலுள்ள கிரகங்களுக்கு எந்தப் பாதிப்பும் ஏற்படாதபோது அந்தக் கிரகங்களால் பூமிக்கும், பூமியில் உள்ள மனிதர்களுக்கும் பாதிப்பை ஏற்படுத்தும் என்று கூறுவது ஏற்றுக் கொள்ளக் கூடியதா? உலக விஞ்ஞானிகள் மற்ற கிரகங்களுக்கு அத்தகைய சக்தியில்லை என்கிறார்கள். சோதிடர்கள் கிரகங்களுக்கு சக்தி உண்டு என்று பொய் கூறுகிறார்கள்! ஏமாளிகள் இங்குதானே இருக்கிறார்கள்.

கிரகங்களுக்கு சக்தி உண்டா?

17.4.2005இல் தில்லி பல்கலைக்கழக விஞ்ஞானி அளித்த பேட்டியில், ஈர்ப்புவிசை தவிர கிரகங்களுக்கு வேறு எந்த சக்தியும் இல்லை என்று கூறியிருக்கிறார்.

17.09.2005இல் சன் தொலைக்காட்சியில் பேசிய தமிழ்நாடு வானவியல் அறிவியல் கழக விஞ்ஞானி தேவதாஸ் கிரகங்களுக்கு ஈர்ப்புவிசை தவிர வேறு எதுவும் கிடையாது என்று விளக்கமளித்தார்.

7.08.2005-இல் சன் தொலைக்காட்சியில் மாலனுடன் உரையாடிய விஞ்ஞானி அறியாமையால்தான் கிரகங்களால் மனிதர்களுக்குப் பாதிப்பு ஏற்படுமென்று நம்புகின்றனர். கிரகங்கள் நம்மை ஒன்றும் செய்வதில்லை என்று விளக்கினார்.

இதே கருத்துதான் அறிவியல் விஞ்ஞானிகளின் கருத்தும் ஆகுமென்று தில்லி பல்கலைக்கழக விஞ்ஞானி கூறியிருக்கிறார். உலக விஞ்ஞானிகளின் கருத்தும் அதுவே தான்!

விஞ்ஞானிகளின் கருத்தையும், ஆய்வு களையும் ஏற்றுக் கொள்ளாமல், எந்த அறிவியல்அறிவும் இல்லாத சோதிடர்கள் கூறுவதைக் கேட்டு கிரகங்களுக்கு ஏதோ சக்திஇருப்பதாக நம்புவது விஞ்ஞான உல கத்திலிருந்து விலகிச்செல்வதாக ஆகாதா?

உண்மை இருக்குமானால் நம்புங்கள். சொல்லுகின்றவரைப் பொறுத்துதான் எதையும் நம்ப வேண்டும்! தமிழர்கள் முன்னேறிவிடக்கூடாது, கல்வி கற்று உயர்ந்திடக் கூடாது என்ற மனப்பான்மை யுடன் வாழ்ந்து வரும் பார்ப்பனர்கள் கூறுவதை நம்பலாமா? தமிழர்கள் தற்குறி களாகவே இருந்திட வேண்டும் என்பதற் காகவே பார்ப்பனர்களால் அறிவுக்குப் பொருந்தாத சோதிடம் திணிக்கப்பட்டிருக் கிறது.

அமெரிக்காவின் நாசா விண்வெளி ஆராய்ச்சிக் கூடத்தில் பணியாற்றும் விஞ்ஞானிகள் சில கருவிகளை விண்வெளி ஆய்வுக்கூடத்தில் இணைப்பதற்கு பூமியிலிருந்து 350 கிலோ மீட்டர்உயரத்தில் வானவெளியில் மிதந்தபடி இணைப்புப் பணியை மேற்கொண்டதை தொலைக் காட்சியில் அனைவரும் பார்த்திருக்கக் கூடும்! பூமியின் ஈர்ப்பு விசை 350 கி.மீ. உயரத்தில் வலுவிழந்து இருப்பதால் மனிதர் கள் கீழே பூமியில் விழுந்து விடாமல் வான வெளியில் மிதக்கிறார்கள்.

பூமியைப் போலவே மற்ற கிரகங் களுக்கும் ஈர்ப்பு விசை மட்டுமே உண்டு! அதுவும் சில குறிப்பிட்ட தூரத்திற்கே! பூமியை எட்டுகிற அளவிற்கோ அல்லது பூமியை தாக்குகிற அளவிற்கோ எந்த சக்தியும் இல்லை என்பதை இதன் மூலம் அறிய முடியும்!

அறிவியலா? - சோதிடமா?

கிரகங்களுக்கு வேறு ஆற்றல் இல்லை என்பதை விஞ்ஞானிகள் கூறியுள்ள தெளிவான ஆதாரப்பூர்வமான விளக்கத்திற்குப் பிறகும், கிரகங்களின் சக்தி மனித வாழ்வின் எல்லா அம்சங்களையும் நிர்ணயிக்கின்றன என்று சோதிடர்கள் கூறுவதை நம்பலாமா? எந்த ஆய்வின்படி, ஆதாரத்தின்படி சோதிடர்கள் இவ்வாறு கூறுகிறார்கள்?

அறிவியல் விஞ்ஞானிகளின் ஆய்வுக் கருத்தை ஏற்றுக் கொள்ளாமல், வேத அய்தீகக் கருத்தை அடிப்படையாகக் கொண்ட தவறான கணிப்பைக் கொண்ட பஞ்சாங்கத்தை வைத்துக் கூறப்படும் சோதி டத்தை இன்னும் நம்பிக் கொண்டிருப் பவர்களுக்கு சிந்திக்கும் திறனே இல்லை என்று தான் கூற வேண்டும்.!

பூமியிலிருந்து கிரகங்களின் சராசரி தூரம்

புதன் கிரகம் 9 கோடி 20 இலட்சம் கி.மீ.

வெள்ளிக் கிரகம் 4 கோடி 20 இலட்சம் கி.மீ.

செவ்வாய்க் கிரகம் 7 கோடி 70 இலட்சம் கி.மீ

வியாழன் (குருகிரகம்) 62 கோடி 80 இலட்சம் கி.மீ

சனிக் கிரகம் 127 கோடி 70 இலட்சம் கி.மீ

யுரேனஸ் கிரகம் 272 கோடி 20 இலட்சம் கி.மீ

நெப்டியூன் கிரகம் 435 கோடி 30 இலட்சம் கி.மீ

புளூட்டோ கிரகம் 575 கோடி 90 இலட்சம் கி.மீ

பூமி நீள்வட்டப்பாதையில் சூரியனைச் சுற்றி வரும் போது 15 கோடியே 21 இலட்சம் கி.மீ. தூரத்திலும், சூரியனை நெருங்கி வரும் போது 14 கோடியே 71 இலட்சம் கி.மீ. தூரத்திலும் இருக்கும். அது போன்றே மற்ற கிரகங்களும் சூரியனை நெருங்கி வரும் போதும், சூரியனிலிருந்து தூரத்தில் இருக் கும்போதும் கிரகங்களின் தூரம் சிறிது மாறுபடும்!

எந்தக் கிரகத்தின் ஈர்ப்பு விசையும் பூமியை எட்டவே எட்டாது! வேறு சக்தி கிரகங்களுக்கு இருப்பதாக விஞ்ஞானம் கூறவில்லை! விஞ்ஞானத்தை நம்புங்கள்!


---------------நன்றி:- 17-4-2009 "விடுதலை" யிலிருந்து